Charta qua Landrada dat monasterio Cluniacensi quemdam boscum pro caballo.
In nomine Verbi incarnati. Notum sit omnibus hominibus tam presentibus quam et futuris, quod ego Landrada, pro anime meę remedio et senioris mei et filiorum meorum, dono Domino Deo et sanctis apostolis ejus Petro et Paulo et Cluniacensi loco, unum boscum, terminante ab una parte terra Sancti Petri, ab altera terra Sancti Andreę. Facio autem hanc donationem tali conventu, ut dent michi monachi de Cluniaco unum caballum valente solidos triginta, et post mortem meam corpus meum recipiant et sepeliant. S. Landradę, quę fieri firmarique rogavit. S. Hugonis, Uperti, Bernardi, Rodberti, Girberti, Vuidonis, Bonifilii.